15 մթերք, որոնք մեծացնում են ուշադրության կենտրոնացվածությունը, լավացնում հիշողությունը, կանխում տրոմբները

Երբևէ մտածե՞լ եք, թե որ մթերքներն են առավելագույնս օգտակար ուղեղի համար։ Պատասխանը, կարծես, ակնառու է՝ օգտակար։ Իսկ որո՞նք են օգտակարները։ Այն մթերքները, որոնք պարունակելով հակաօքսիդանտներ, վիտամիններ և միկրոէլեմենտներ՝ պայքարում են հիվանդությունների դեմ և պաշտպանում ուղեղի բջիջները վնասվելուց, նվազեցնում Ալցհեյմերի հիվանդության, դեմենցիայի, դեպրեսիայի վտանգը, պաշտպանում իմունիտետը և նպաստում մարսողությանը։ Կրկի՞ն պարզ չէ։ Անկեղծ ասած՝ մեզ էլ։ Հավանաբար, ավելի ճիշտ կլինի պարզապես ներկայացնել 15 ամենաօգտակար մթերքները, որոնք բոլորիս քաջ ծանոթ են, և հիմնականում մատչելի։ Դրանք կարևոր է ունենալ ճաշացանկում։

ԱՎՈԿԱԴՈ

Այդ պտուղը օգտակար մոնոհագեցած ճարպերի աղբյուր է, որը կարող է նվազեցնել հիշողության թուլացման արագությունը և բարելավել արյան մեջ շաքարի պարունակության ցուցանիշը։ Ավոկադոն պարունակում է վիտամին K և ֆոլաթթու, որը կանխարգելում է ուղեղում տրոմբի գոյացումը և նվազեցնում ինսուլտի ռիսկը, նպաստում է հիշողության բարելավմանը և կենտրոնացվածության աճին։ Ավոկադոն պարունակում է նաև B և C վիտամիններ, սպիտակուցներ։

ԲԱԶՈՒԿ

Բանջարեղենի այդ տեսակը նպաստում է բորբոքային պրոցեսների նվազեցմանը, պարունակում է հակաօքսիդանտներ, որոնք պաշտպանում են չարորակ նորագոյացություններից և արյան միջից հեռացնում են տոքսինները։ Բազուկի պարունակած բնական նիտրատները ուժեղացնում են արյան հոսքը դեպի ուղեղ և բարելավում դրա աշխատանքը։

ՀԱՊԱԼԱՍ ԵՎ ԱՅԼ ՀԱՏԱՊՏՈՒՂՆԵՐ

Հապալասը, ելակը, մոշը և ազնվամորին միշտ պետք է լինեն սեղանին։ Դրանցից առաջինն իսկական չեմպիոն է հակաօքսիդանտների պարունակությամբ։ Պարունակում է նաև C և K վիտամիններ ու բջջանյութ։ Հապալասում գալիկաթթվի բարձր պարունակությունը ուղեղը պաշտպանում է դեգեներացիայից, ճանաչողական գործառույթների անկումից և սթրեսից։

ՈՍԿՐԱՅԻՆ ԱՐԳԱՆԱԿ

Ոսկորներից, ասենք տավարի, պատրաստած արգանակը կօգնի ամրացնել իմունիտետը, լավացնել հոդերի վիճակը և թեթևացնել սննդային ալերգիան։ Կոլագենի բարձր պարունակությունը նպաստում է աղիների բորբոքման դեմ պայքարին, իսկ ամինաթթուները (պրոլին, գլիցին) լավացնում են իմունային համակարգը և հիշողությունը։

ԽԱՉԱԾԱՂԻԿ ԲԱՆՋԱՐԵՂԵՆ (ՀԱՏԿԱՊԵՍ ԲՐՈԿՈԼԻ)

Բրոկոլին, ինչպեսև ծաղկակաղամբը, բրյուսելյան կաղամբը ու սպիտակ կաղամբը՝  վիտամին K-ի և քոլինի պարունակության շնորհիվ շատ օգտակար են ուղեղի համար, քանզի նպաստում են հիշողության պահպանմանը։ Իսկ վիտամին C-ն և ֆիտոնուտրիենտները ուղեղի բջիջները պաշտպանում են օքսիդատիվ սթրեսից։

ՆԵԽՈՒՐ

Այս բույսը հայտնի է հակաօքսիդանտների մեծ պարունակությամբ, որոնք բնական հակաբորբոքային նյութեր են։ Առհասարակ, նեխուրը պարունակում է վիտամինների, միկրոէլեմենտների և սննդանյութերի միացությունների մեծ ցանկ։

ԿՈԿՈՍԻ ՅՈՒՂ

Այն ճնշում է բորբոքման համար պատասխանատու բջիջները։ Կոկոսի յուղը դանդաղեցնում է հիշողության կորստի գործընթացը, պայքարում աղիների ախտածին միկրոֆլորայի դեմ, նվազեցնում Ալցհեյմերի հիվանդության վտանգը։

ՍԵՎ ՇՈԿՈԼԱԴ

Շոկոլադը պարունակում է հակաօքսիդանտ և հակաբորբոքային նյութեր։ Կակաոն բարելավում է դեպի ուղեղ արյան հոսքը և ուղեղի հագեցումը թթվածնով, նվազեցնում է զարկերակային ճնշումը և օքսիդատիվ սթրեսը ուղեղում ու սրտում: Շատ կարևոր է իմանալ՝ որքան մուգ է շոկոլադը, այնքան այն առողջարար է։

ՁՎԻ ԴԵՂՆՈՒՑ

Դեղնուցի պարունակած քոլին նյութը նպաստում է հղիության ընթացքում պտղի ուղեղի զարգացմանը: Այն քայքայում է բեթանը՝ նյութ, որն արտադրում է առույգություն ապահովող հորմոններ։

ԱՌԱՋԻՆ ՍԱՌԸ ՄԶՎԱԾՔԻ ՁԻԹԱՅՈՒՂ

Այդ տեսակի ձիթայուղը ուղեղի համար օգտակար է հակաօքսիդանտների և մոնոհագեցած ճարպերի շնորհիվ: Դա միջերկրածովյան և MIND դիետաների առանցքային մթերքներից է, որն հիշողության բարելավման առումով միանշանակ օգտակար է տարեց մարդկանց։ Ձիթապտղի յուղը նպաստում է լավ ուսումնառությանը, հիշողության բարելավմանը, կասեցնում տարիքային փոփոխությունները, պայքարում է ուղեղի համար թունավոր սպիտակուցների դեմ, որոնք հրահրում են Ալցհեյմերի հիվանդությունը։

ԿԱՆԱՉ ՏԵՐԵՎՆԵՐՈՎ ԲԱՆՋԱՐԵՂԵՆ

Կանաչ տերևներով բանջարեղենի կանոնավոր օգտագործումը սննդակարգում նպաստում է դեմենցիայի կանխարգելմանը: Այդ տեսակի բանջարեղենը պարունակում է A և K վիտամիններ, որոնք պայքարում են բորբոքումների դեմ և ամրացնում ոսկորները:

ՌՈԶՄԱՐԻՆ ԵՎ ԱՅԼ ԽՈՏԱԲՈՒՅՍԵՐ

Ռոզմարինում առկա կարնոզաթթուն ուղեղը պաշտպանում է դեգեներատիվ պրոցեսներից, որոնք կարող են հանգեցնել Ալցհեյմերի հիվանդության և ինսուլտի։ Ռոզմարինն ունի հակաբորբոքային հատկություններ և հակաօքսիդանտների պարունակության շնորհիվ օգտակար է տեսողության համար։ Հակաօքսիդանտներով նմանապես հագեցած են ռեհանը, անանուխը, եղեսպակը, մաղադանոսը և այլն։

ՍԱՂՄՈՆ ԵՎ ՅՈՒՂՈՏ ՁԿԱՆ ԱՅԼ ՏԵՍԱԿՆԵՐ

Սաղմոնը պարունակում է օմեգա-3 ճարպաթթուներ, որոնք նպաստում են ուղեղի աշխատանքին և կանխարգելում են Ալցհեյմերի հիվանդությունը և թուլամտությունը։ Ճարպոտ ձուկը (սարդինա, իշխան) օգտակար է նաև երեխաների համար՝ լավացնում է ուշադրությունը։

ՔՐՔՈՒՄ

Քրքումի մեջ առկա կուրկումին նյութը համարվում է հզոր հակաբորբոքային միջոց։ Քրքումը բարձրացնում է օրգանիզմում հակաօքսիդանտների մակարդակը, ուժեղացնում է իմունային պատասխանը, բարելավում ուղեղի ապահովումը թթվածնով։

ՀՈՒՆԱԿԱՆ ԵՎ ԱՅԼ ՏԵՍԱԿԻ ԸՆԿՈՒՅԶՆԵՐ

Հունական ընկույզը բարելավում է հիշողությունը։ Պարունակում է հակաօքսիդանտներ, վիտամիններ, միկրոէլեմենտներ և խթանում մտավոր գործունեությունը։ Դրանում առկա վիտամին E-ն պաշտպանում է ուղեղի բջիջները և կանխում Ալցհեյմերի հիվանդությունը: